O Teatro Principal de Santiago acolleu a entrega de premios do Santiago(é)Tapas
Un entretido evento no Teatro Principal serviu coma colofón do Santiago(é)Tapas 2015, a gran cita gastronómica da capital de Galicia na que Trevisani traballou por oitavo ano consecutivo
Ferro, A Curtidoría, Siro González, El Bocalino, Lusco & Fusco, The Seafood Bar, Gaia e A Grella foron os locais galardoados no certame de tapas santiagués
A empresa de organización de eventos Trevisani volveu encargarse de múltiples tarefas como secretaría técnica, apoio en comunicación, protocolo e relacións públicas, procura de patrocinadores, persoal auxiliar e azafatas…
A actriz Patricia de Lorenzo foi a encargada de conducir a entrega de premios.
Listaxe de premiados
O Premio do Xurado á Mellor Tapa 2015 correspondeulle a Ferro, pola tapa “Pata de vitela, castañas e Mexillón de Galicia”. O premio está dotado con 500 euros.
O Primeiro Premio Tapa do Público ‘15 foi para a tapa “Costela de cabra da Mercé”, do restaurante Siro González. O galardón conta con 1.000 euros de recompensa. Pola súa banda, El Bocalino, co “Chupachús de poldro galego con sementes de liño, patacas reixa e ameixas salvaxes”; e Lusco & Fusco, con “Torta de queixo do Cebreiro con base de noces, mel e figos”, conseguiron o Segundo e Terceiro Premio de Tapa do Público ‘15 con 800 e 500 euros de premio respectivamente.
O Premio do Xurado á Tapa que mellor marida con Estrella Galicia 2015 foi para A Curtidoría, con “Outono en Compostela”, dotado con 500 euros en produtos Hijos de Rivera. Pola súa banda, o público outorgou o Primeiro Premio á Tapa que mellor marida con Estrella Galicia 2015 a Gaia, pola tapa “O Caínzo”, cunha contía de 200 euros en produtos.
O Premio (é)xcelente 2015 recaeu en The Seafood Bar, que recibe 500 euros por ser o establecemento mellor valorado polos clientes como experiencia global no concurso.
O Premio á Tapa con máis Chispa 2015, promovido da man de Coca Cola Iberian Partners, é para A Grella, por “O carbón da Grella”.
Na cita tamén se desvelaron as fotografías gañadoras dos concursos en redes sociais, na que Turkish Airlines e Coca Cola Iberian Partners premiaron a interacción e creatividade do público de Santiago(é)Tapas.
Datos do concurso
A oitava edición do Santiago(é)Tapas funcionou como plataforma de difusión da hostalería compostelá no mes de novembro. Un total de 69 establecementos embarcáronse neste concurso no que se presentaron 109 tapas distintas, que foron moi ben acollidas entre uns clientes que destacaron a súa calidade. Servíronse máis de 31.000 petiscos entre os establecementos participantes.
Todas as tapas que se serviron durante a última edición de Santiago(é)Tapas incorporaron algún produto galego de calidade, con denominación de orixe ou indicación xeográfica protexida.
Os participantes mostraron unha gran satisfacción polos resultados obtidos nun certame que contou con moitísima afluencia de público e eco nas redes sociais.
Santiago(é)Tapas estivo organizado no 2015 por primeira vez de xeito conxunto por Turismo de Santiago e máis a Asociación Hostalería Compostela. Contou co patrocinio do Consello Regulador da Denominación de Orixe Ribeiro, Cash Record e Coca Cola, a colaboración especial de Estrella Galicia e Turkish Airlines. o apoio de Rio Natura Monbus Obradoiro; e a colaboración de Cabreiroá e Renfe.
